India-ah hri kai thar 38,164 an awm : Ni 104 chhung hri vanga thi tlem ber ni thleng

India ramah Pathianni khan coronavirus kai thar mi 38,164 an awm leh. Hemi ni vek hian hri vanga thi mi 499 awmin, ni 104 hnua hri vanga thi an tlem ber ni a thleng.

Union health minister chuan ram pumah hri kaihhnawih vanga thi 4,14,108 an awm tawh nimin khan a tarlang.

Covid-19 kai hmuh chhuah tawh hi mi 3,11,44,229 an tling tawh a ni. Hri kai mek, active case chu 4,21,665 ah tlahniam tawhin, hri kai tawh aṭangin 1.35% an ni a, ramchhunga Covid-19 kai dam tawh zat chu 97.32% an ni tawh bawk. Pathianni khan hri kai mek hi 995 in an tlahniam a ni.

Pathianni khan mi 14,63,593 test belh leh an ni a, ram pumah Covid-19 test 44,54,22,256 neih ni tawhin, nitina hri kai,daily positivity rate hi 2.61% a ni. Ni 28 chhung chu 3% hnuai lamah a tla thla tawh a, kartina hri kai hmuhchhuah, weekly positivity rate chu 2.08% a ni mek niin ministry chuan a tarlang.

India ramah Covid-19 kai hi nikum August 7 khan nuai 20 awm tlingin, August 23 khan nuai 30, September 5-ah nuai 40, September 16-ah nuai 50. September 28-ah nuai 60 pel lehin, October 11-ah nuai 70, October 29-ah nuai 80, November 20-ah nuai 90 leh December 19 khan vaibelchhe khat a pel a ni. Kumin May 4 khan vaibelchhe hnihah an kai chho leh a, June 23 khan vaibelchhe 3 a pel leh a ni.

Mi vbc 40 chuangte 'Baahubali' an ni ta : PM
Prime minister Narendra Modi chuan nimina Parliament session neih hmaa Parliament kawtah media mite hmaa thu a sawiah, Covid vaccine la tawh mi vaibelchhe 40 chuang chu hri leng do meknaah 'Baahubali' an ni tawh a ni, a ti.

Bahu hi kut/ban tihna niin, bal hi chakna tihna a ni. Baahubali hi mi chak, ban tha chak tak sawina atante hman a ni ṭhin.

PM Modi chuan, "Vaccine hi banah (arms) ah pek a ni a, vaccine la tawhte hi 'Baahubali' an ni. Baahubali hi vaibelchhe 40 chuang an awm tawh a, hma pawh kan sawn zel dawn a ni," tiin hri leng chuan khawvel ram pum a tibuai a, Parliament session-ah pawh sawiho tur pawimawh zingah a tel a ni, tiin a sawi.

Modi chuan MP hrang hrang hnen aṭangin hri leng dona kawnga hmalakna tur, rawtna ṭhate an dawng dawn a, heng aṭang hian kalphung thar leh, an lo kalpuina tawhnaa fel tawk lote pawh siamṭhain theitawp an chhuah leh dawn tih a sawi bawk.