Delhi-ah March 2 hnua a vawikhatna atan Covid-19 vanga thi awm loh ni thleng

Covid-19 hri leng tuar nasa ber zinga mi,Delhi-ah hri leng dinhmun ziaawm tawh hle a, Pathianni khan ni 104 hnua Covid-19 vanga thi an awm loh ni a thleng.

Delhi khawpuiah hian Pathianni tih loh, coronavirus vanga thi an awm loh hnuhnun ber ni chu March 2 kha a ni.

Pathianni khan Delhi-ah Covid kai thar 51 awm belh lehin, hri kai thar zat,positivity rate hi 0.07% a ni tawh. Hri kai mek, active case hi 592 ah an tlathla tawh bawk. Hri vanga thi hi mi 25,027 an tling tawh a, enkawl dam mi 14,09,910 an awm tawh bawk a ni.

Hri kai tam zualna hmun, containment zone 50,000 chuang awm ṭhin pawh 409 ah a tlathla tawh bawk.

April 20 kha Covid-19 kai hmuhchhuah thar tam ber ni niin, mi 28,395 an awm. Hetihlai hian May 3 kha hri vanga thi an tam ber ṭum niin, Delhi khawpuiah hian mi 448 in Covid-19 vangin nunna an chan a ni.