Covid-19 : Ni 125 hnua hri kai hmuhchhuah tlem ber ni thleng

India ramah Thawh­lehni khan Covid-19 kai thar 30,093 an awm a, hei hi ni 125 hnua hri kai hmuhchhuah tlem ber ṭum a nih thu Union Health Ministry chuan a sawi. Ramchhungah hri kai mek, active case 4,06,130 an awm a, ni 117 hnua an tlem ber ṭum a ni bawk.

Kartina hri kai thar zat, weekly positivity rate chu 2.06% niin, nitina hri kai thar zat, daily positivity rate chu 1.68% a ni.

Thawhṭanni vek khan coronavirus kaihhnawih vanga thi 374 leh dama chhuahtir 45,254 an awm.

India-ah hri kai hmuh chhuah tawh mi 3,11,74,322 zinga mi 3,03,53,710 te chu enkawl dam an ni tawh a, 4,14,482 te chuan he hri avang hian nunna an chan tawh thung.

Indian SARS-CoV-2 Genomics Consortium (INSACOG) Co-Chair, Dr NK Arora chuan hri kai thar zinga 80% te chuan Covid-19 Delta variant an kai tih a sawi. National Expert Group on Vaccine Administration hotu Arora hian Alpha variant aiin Delta variant te hi 40-60% velin inkaichhawn a awlsam zawk a ni, a ti.

Covid-19 Delta variant, B.1.617.2 hi India ramah October 2020 khan hmuhchhuah a ni a, ramchhunga hri leng thawh hnihna thlentu a ni.