Tamil Nadu-ah mask vuah loh avangin mi mtd 1.8 hrem tawh

Tamil Nadu police-te chuan ni 101 chhungin mi maktaduai 1.8 te chu mask an vuah loh avangin an man a, Rs 200 ṭheuh chawitir a ni.

Police-te hian April 8 leh July 17 inkar khan vantlang hmuna mask vuah lo mi 18,07,651 te chu manin epidemic diseases act hnuaiah thubuai an siamsak. Hei bakah hian social distancing dan an zawm loh vangin mi 88,836 chu thubuai siamsak an ni bawk. Man zinga a tam zawk chu dawrkai leh vantlang hmuna pungkhawm, metre khata inhlata awmna dan siam zawm lo te an ni.

Mithiamte chuan ramchhungah hri leng thawh thumna chu tun aṭanga hun reiloteah lo thleng mai thei a nih thu an sawi avangin, police-te hian thuneitu sang lam aṭanga thupek an dawn angin Covid-19 norms chu khauh takin an kengkawh mek a, dan bawhchhiate chu hremna pek nghal zel an ni tih an sawi.

State sorkar hian hri leng thawh khatnaah khan epidemic diseases act hi a hmang tawh bawk a, Covid-19 appropriate behaviour, mask vuah leh social distancing ṭha taka zawm turin thupek a chhuah. Dan zawm lo te chu dan hmanga hrem ṭhin an ni. March thla aṭanga hri kai an pun chhoh leh aṭang khan police te chuan Covid-19 appropriate behaviour zawm lo te chungah khauh zawkin hma an la a ni.