Pegasus bitum zingah Rahul Gandhi leh Prashant Kishor-te an tel

Israel spyware 'Pegasus' hmanga bitum zingah eptu party, Congress hruaitu Rahul Gandhi, poll strategist Prashant Kisho leh IT Minister thar Ashwini Vaishnaw-te pawh an tel.

The Wire-in a tarlan dan chuan Rahul Gandhi mobile phone account pahnih leh India number 300 chu phone hacking software, Pegasus-in a bitum zingah hian a tel a ni. Rahul-a number, tuna a hman tawh loh chu kum 2018 aṭanga 2019 kum laihawlah khan bitum tur zingah a tel niin a lang. Congress chuan sorkar chu Rahul-a phone biakte lo ngaithla nia puhin BJP chu Bharatiya Jasoos (spy) Party tiin an sawi nghe nghe.

Pegasus hian Union Minister pahnih - Prahlad Patel leh Ashwini Vaishnaw-te pawh a bitum niin The Wire chuan a tarlang a, Patel phei chu ama number mai bakah a nupui leh a laina hnaite number thlengin an bitum niin an tarlang.

Ashwini Vaishnaw pawh hi BJP a zawm hma, kum 2017 velah khan bitum zingah a tel niin an tarlang bawk. Politician langsar tak takte bakah hian journalist 40 lai an tel niin an sawi bawk. Pegasus hi Israeli company NSO Group-in khawvel ram hrang hrang sorkar hnenah 'vetted government' atana an zawrh a ni. Amnesty International Security Lab-in digital forensics a tih aṭanga The Wire hnena data a 'share'-ah heng politician-te hming hi bitum zingah a tel tih a lang.

Pegasus hi hman sual theih nia ngaih a nihna a rei tawh hle a, rinhlelh a nihna pawh a rei tawh hle. Call leh message bakah audio thlengin a record vek thei nia sawi pawh an awm tawh ṭhin.

Congress-in chhui chian a phut
Congress party chuan nimin khan Pegasus scandal chungchang hi Parliament-ah sawichhuak lehin, Joint Parliament Committee-in a chhui chian an phut. Pegasus chungchang avang hian Congress leh eptu party dangte chuan nimina Parliament in hnihah ro rel mumal thei loin an aubuai leh a ni.

Congress party thupuangtu chuan, BJP kaihhruai NDA sorkar chuan Pegasus spyware hi a lei ngem tih a sawichiang tur a ni tiin, phone tapping hi national security leh fundamental rights palzutna a ni a, House pahnihah pawh sawiho ngei a ngai tih a tarlang.

He thil duh lohna lantirin Congress party chuan July 22 hian nawrh huaihawt an tum a, hemi ni hian state tinah 'Pegagus Project' media report chungchangah press conference neih an tum. Hei bakah hian party state unit tinte chuan Raj Bhavan-ah lungawi lohna lantirin kawngzawh an tum bawk a ni.

Hetih lai hian sorkar laipui chuan Pegasus software hmanga politician, journalist leh midang ṭhenkhatte phone enthlak sak nia puhna hi a pha thung a, Congress party chu thu dik lo hmanga tihhmingchhiat tumah a puh let thung. Prime minister Narendra Modi chuan Parliament-a rorel thei loa eptute chet dan chu sawiselin, Congress chu dawt sawiah puhin, an dawt sawi chu thudik hmanga hneh turin an party MP-te chu a chah a ni.