TDP-BJP inkar boruak ṭha lo

National Demo­cratic Alliance (NDA) hnuaia thawkdun, Telegu Desam Party (TDP) leh Bharatiya Janata Party (BJP) inkar boruak chu a ṭha lo chho zel a, Andhra Pradesh Chief Minis­ter leh TDP hotu N Chandrababu Naidu leh TDP member-te chuan nimin khan meeting neiin, an awm zel dan tur an ngaihtuah.

Chandrababu Nai­du leh TDP member-te hi February 1-a Union Finance Minister Arun Jaitley-ah Union Budget 2018 a pharhah an state tana sum pekbelh tura an ngenna telh a nih loh avangin an lungawi lo hle a ni.

Nimina TDP Parliamentary Board meeting an neih hmaa chan­chin thar lakhawmtute a kawm­naah, party hruaitu K Rammohan Rao chuan budget chungchang hi an sawiho tur thu a tarlang. Politics lama thawhdunna leh state hmasawnna chu thil hrang daih a nih thu a sawi bawk. Party MP P.Ravindra Babu chuan state tana sum pek zatah CM chu a lungawi lo hle tih sawiin, "CM thutlukna siam apiang chu kan thlawp ang. BJP budget-ah hian kan lungawi lo a, AP tana sum a dah zatah hian kan lungawi thei lo a ni", a ti.

TDP hi chhim lam biala BJP thawhpui party lian ber a ni. Kum 2014 Lok Sabha inthlanpuiah khan party pahnihte hi an thawkdun a, NDA hnuaiah BJP tih lohah TDP hi seat ngah ber a ni.

Finance Minister Arun Jaitley-an budget a pharh hnu khan TDP hruaitu eng emaw zat chuan BJP nena an thawhdunna tihtawp a, NDA aṭanga inhnuhdawh an duh thu an sawi. Party MP-te pawhin Naidu-an a ngen a nih chuan MP an nihna aṭanga ban pawh an inhuam thu an sawi a ni.

Hetih lai hian party hruaitu leh union minister YS Chowdary chuan NDA aṭangin TDP chu a chhuah nghal mai loh tur thu leh, Andhra Pradesh tana fund a pek loh chungchangah sorkar laipui chu nawr chhunzawm zel a nih zawk tur thu a sawi.