Eptu MP-ten Rajya Sabha-ah lungawi lohna lantir

Nimina Rajya Sabha rorel inkhawmah eptu party MP-ten lungawi lohna lantira rorel theiloa an aubuai avangin chairan M Venkaiah Naidu chuan inkhawm a titawp.

Rajya Sabha inkhawmah hian Question Hour pawh hman a nih hmain eptu member-te hi House laiah chhuak khawmin an au bengchheng a ni. Samajwadi party MP-te chuan BJP sorkarna, Uttar Pradesh-a police-ten civil mi an kahhlum chungchangah an lungawi lohna an lantir a ni. Aam Aadmi Party MP-te chuan sorkar laipuin Dehli-a sumdawnna hmun ṭhenkhat kharsakna tur thupek a tihchhuah avangin lungawi lohna an lantir bawk. Congress member Ramachandra Rao chuan kar hmasaa Union Budget 2018 pharhah Andhra Pradesh hming sawilan a nih ve loh avanga a lungawi lohna thuziak a rawn keng lang bawk a ni.

Rorel inkhawm hi chawhma dar 11-ah

ṭan a ni a, paper-te pharh a nih hnuin Zero Hour neih a ni ṭhin. Question Hour-ah hian MP-te chuan sorkar laipui chu a policy chungchangah zawhna hrang hrang an zawt thei a, he hun hi chawhnu lamah neih a ni tlangpui ṭhin. Mahse nimin rorel inkhawmah chuan Question Hour nei hman loin eptu member-te aubuai avangin inkhawm hi tihtawp a ni.

Eptu party, SP, AAP leh Congress member-te lungawi loa House laia chhuak khawma, an aubuai chu sawiselin, House chairman Naidu chuan hetiang dinhmuna House kalpui zel chu a duh lo tih a sawi. Member-te awmdan chu thil tih dan tur ṭha a ni lo tih a sawi a ni.

Lok Sabha-ah chuan kar kalta Inrinni-a thi, BJP MP Hukum Singh sunna hun hman a ni. Rorel inkhawm ṭan a nih veleh member thar pathum, Rajasthan-a Congress member Karan Singh Yadav leh Raghu Sharma bakah, West Bengal-a TMC member Sajda Ahmed-te chu rinawmna thu tiamtira lakluh an ni. Hemi hnu hian Speaker Sumitra Mahajan kaihhruaiin Uttar Pradesh Hukum Singh-a sunna hun hman a ni a, inkhawm tihtawp nghal a ni.