Israel anti-tank missile leina tur buaipui ṭan

India-in sorkar leh sorkar indawrna, government - to - government (G2G) route hmanga Israel aṭanga anti-tank guided missile Spike lei a tum chu buaipui ṭan a ni.

Nimin khan India tlawha rawn zin, Israel defence secretary Major General (retired) Udi Adam leh India defence secretary Sanjay Mitra-te chuan Delhi-ah meeting an nei. Adam hi ni hnih cham turin a rawn zin a, a cham chhung hian India-in G2G route hmanga Rafael Advanced Defense Systems siam Spike missile 3,000 lei a tum chungchangah an inbiak fel hman beisei a ni.

Sorkar laipui chain full transfer technology kaltlanga India rama Spike missile siam tura US dollar maktaduai 900 man order a lo siam tawh chu January thla khan a cancel a, defence ministry chuan technology transfer man hi a tel dawn tak loh avangin Israel missile hi man tlawm zawka lei theih a beisei.

Hetihlai hian Defence Research and Development Organisation (DRDO) chuan Nag anti-tank missile system a siam mek a ni. Mahse ramchhunga siamte hi peihfel a nih hmaa sipaite indaih lohna phuhruk nan Israel missile system hi lei tum a ni a, hei hi DRDO pawhin a dodal lo.