Jamia zirlai silaia kah vangin zirlaite'n lungawi lohna lantir

Ningania South Delhi-a Jamia Millia Islamia University zirlaite'n kawng an zawhnaa mi pakhatin silaia zirlai pakhat a kah hliam avangin, nimin khan zirlaiten lungawi lohna an lantir.

Jamia zirlaiten hi Citizenship Amend­ment Act (CAA) leh National Register of Citizens (NRC) duh lohna lantira kawng an zawh laiin kum 31 mi Gopal chuan revolver silai kengin zirlai kawngzawhte chu silaia tinin, zirlai pakhat Shadab chu a banah a kap hliam a ni.

Police-te chuan silai hmetpuaktu hi custody-a thuzawh fiah tura lak a nih thu an tarlang. He thil thleng chungchangah hian home minister Amit Shah chuan thil tisualtu chu kan zuah lo ang, tiin a sawi ve bawk.  

Zirlaite pawh kawngzawhte silaia tin an nih lai hian an bul hnai aṭangin police-te chuan dan tum loin an lo thlir mai mai tih an sawi. He pawikhawihna thleng duh lohna lantirin  Ningani zan aṭang khan university hrang hranga zirlaite chu Delhi police headquarters kawtah an pungkhawm a, nimin thleng khan an awm a ni. Zirlaite chuan Delhi police-te chet dana an lungawi loh thu an sawi.