Firfiakten Srinagar hospital bulah police-te bei

Jammu and Kashmir-a Srinagar hospital bulah firfiakten police party beiin, police pakhat an kahhlum bakah pakhatin hliam a tuar. Police-te kut aṭang hian Pakistan firfiak pakhat a tlanchhuak bawk.

Police-te chuan an kuta tang mek, Pakistan firfiak pawl, LeT mi leh sa Naveed Jat bakah tang dang mi panga-te chu Srinagar-a Kaka Sarai area-a sorkar damdawi-in, Maharaja Hari Singh Hospital-ah check-up turin an hruai laiin, casualty area-ah firfiakte hian an lo kap niin an sawi.

Srinagar deputy inspector general Ghulam Hassan Bhat chuan he thil thleng hi firfiakte hian a hmaa an lo ruahman sa nia a lan thu a sawi. Police party an beih hnuah firfiakte leh Naveed Jat-te hi an tlanbo zui a, police silai pakhat an laksak bawk nia sawi a ni.

Naveed Jat, Abu Hanzulla tia hriat bawk hi Lashkar-e-Taiba firfiak pawl member niin, Pakistan-a Punjab province-a Multan khaw mi a ni. Police eng emaw zat leh zirtirtu pakhat thahnaa inhnamhnawiha puhin, kum 2014 khan South Kashmir-ah man a ni a, Srinagar-a Rainawawri jail-ah tantir a ni.

Firfiakten damdawi-ina tang hruaitu, police protection party an beihnaah hian an bul vela awm, civil mi hliam tuar pawh an awm tel nia sawi a ni bawk. Tang dang panga-te erawh chu an tlanchhuak ve lo.