Agni-I hlawhtling takin enchhin

Odisha-a Abdul Kalam Island aṭangin nimin zing dar 8.30 khan ramchhunga siam, nuclear ralthuam phur thei Agni-I (A) ballistic missile chu hlawhtling taka kahchhuah a ni.

Balasore-a Abdul Kalam Island-a Integrate Test Range (ITR) launch pad-4 aṭanga kahchhuah, Angi-I hi 18th version niin, km 700 chin kap pha a ni. Indian Army-a Strategic Command-in test hi a buaipui a ni.

Agni-I hi meter 15-a sei niin ton 12-a rit a ni a, kg 1,000 chin phur thei a ni. He base aṭanga Agni missile enchhin hnuhnun ber chu kum 2016, November 22 khan a ni. Missile hi kum 2004 khan armed force kutah hlan niin, surface-to-surface, single-stage missile, solid propellant power-te enchhin a lo ni tawh a ni.

Agni-I hi Advanced Systems Laboratory (ASL) in Defence Research Development Laboratory (DRDL) leh Research Centre Imarat (RCI)-te thawhpuia a siam a ni.