Pollution ven theih loh chuan healthcare programme a buai phah ang - Supreme Court

Supreme Court chuan Delhi khawpui chhung boruak bawlhhlawh belh zel chu a ngaihmawh thu sawiin, boruak bawlhhlawh zel tur chu ven a nih loh chuan sorkar laipuiin heathcare programme lian tak a duan chu a buai phah dawn niin a sawi.

Justice Madal B Lokur-a kaihhruai bench chuan, pollution level sang zel tur hi ven leh khuahkhirh a nih loh chuan mipuite chu an damlo zel mai dawn niin a sawi. He thu hi Delhi-National Capital Region (NCR) tana industry-te meikhu tihchhuah theih chin chungchang ministry of environment, forest and climate change-in a hriattirnaah a sawichhuak a ni.

Justice Lokur chuan, "TV-ah Amitabh Bhachan ngei pawhin khawvela khawpui boruak bawlhhlawh zual 20 zingah 13 chu India rama mi anih thu a sawi a, sorkar pawhin he thil hi pawm tawh a, a siamṭhat hna thawk tur hian muan hun a ni tawh lo", a ti. Nausen piang thar leh lo la piang turte chuan air pollution vang hian nghawng ṭha lo an hmachhawn chho zel dawn a ni, a ti.