National animal-ah bawng hmang turin phut

Jamiat Ulema-e-Hind president Maulana Arshad Madni chuan bawng chu national animal atana puang turin a phut a, hei hi bawng leh mihring te nunna humhalh nan a ngai niin a sawi.

Maulana Arshad Madni chuan bawng humhalh chhuanlama hmanga kut inthlak leh inthahna thleng ṭhin chu ṭha a tih loh thu leh, tihtawp a duh thu a sawi. Hemi rual hian, "Tihtur pahat awm chu bawng hi national animal atana puan a ni. Hei hi hman a nih chuan bawng leh mihring nunna a him phah dawn a, ram tan pawh a ṭangkai dawn a ni", a ti.

Hetih lai hian bawng humhalhtu intiten bawng humhalh chhuanlama tharum thawhna an thlen fo chungchang chu buaipui chhunzawm reng a la ni. January thla khan Supreme Court chuan state pathum–Uttar Pradesh, Rajasthan leh Haryana-te hnenah bawng humhalhtu pawl intite chunga action la tura hriattirna a tihchhuah an zawm loh chungchang sawifiah turin a ti a ni.

He thupek hi Mahatma Gandhi-a tupa, Tushar Gandhi-an petition a thehluh bawhzuia siam a ni. Tushar Gandh hian September 6, 2017-a Supreme Court thupek tihchhuah chu state pathumte hian an zawm lo niin a sawi. Chief Justice Dipak Misra leh Justice pahnih–AM Khanwilkar leh DY Chandrachud awmna bench chuan heng state pathumte hi April 3, 2018 hma ngeia chhanna pe turin a hriattir a ni.