Modi-a sorkar hnuaiah loneitute sum lakluh tlahniam : Sinha

Sorkar laipuiin Union Budget 2018 a pharh tak chu sawiselin, union minister hlui leh BJP hruaitu hlun Yashwant Sinha chuan tun dinhmunah chuan ramchhunga thingtlang mi leh loneitute dinhmun a chhe hle a, kum li kalta chhung khan loneitute sum lakluh hi 1.38% in a tlahniam a ni, a ti.

Calcutta Chamber of Commerce-in inkhawm a buatsaiha thu a sawiah, Yashwant Sinha chuan thingtlang lam miten harsatna nasa tak an tawk mek a, hei hi agriculture growth rate tlakhniam vang ringawt ni loin, loneituten an thlai tharchhuah aṭanga hmun thuma ṭhena hmun khat man vel chauh an lakluh theih vang a ni, a ti.

BJP hruaitu chuan zirchianna neih aṭangin Prime Minister Narendra Modi-a kaihhruai sorkar hnuaiah kum li chhunga agricultural growth rate chu 1.9% a ni a, hetih lai hian sorkar hmasa, Congress kaihhruai UPA sorkar hnuaiah khan 3.8% a ni pha thung niin a sawi.

Modi-a sorkar hnuaia agriculture hlutna chu a tlahniam hle niin Sinha chuan a sawi. Hetihlaia sorkarin kum 2022-ah loneitute sum lakluh a leta tihpun a tum thu a sawi laiin, kum li kalta chhungin an sum lakluh hi pun lam aiin a tlahniam zawk a ni, a ti. Kum li chhung hian eng angin nge hma lak an tum a zawt let bawk.

Sinha chuan Budget paper chu document pawimawh leh serh hran a ni tih sawiin, budget-a rawtna siamte chu a hlawhtlinna turin sum hmangin lo do tel zel tur a ni a, hetianga kalpui a nih loh chuan election manifesto-ah a chhuak mai dawn a ni, a ti. Election manifesto-ah chuan thu tam tak tiamin, a thawhna tura senso ngai leh sum lo luhna turte sawilan ani ngai lo a, mahse budget chu hetiang hian a ti ve theih lo a ni, a ti.