India-ah Covid-19 hri kai hmuh chhuah thar 9,000 chuang awm

Ni khata Covid-19 kai hmuh chhuah tam ber ni a thleng chho deuh reng a, chuti chung chuan 9,000 em hi chu a la tling ngai lo. Nimina Ministry of Health and Family Welfare report tihchhuahah erawh kai hmuh chhuah thar mi 9,304 lai an awm a, ni khata hmuh chhuah tam ni ber a thleng leh a ni.

India ramah hian hripui kai 2,16,919 an awm tling ta a, enkawl dam 1,04,107 awm tawhin hri kai mek 1,06,737 an awm a, mi  6,075-in an thihpui tawh bawk.

Nimina MoHFW report tihchhuah hma darkar 24 chhung khan enkawl dam 3,804 an awm laiin thihpui 260 an awm.

India ram enkawl dam tawh rate hi a tlahniam leh hret a, ni hmasa lamah 48% a kai chhoh laiin nimin report-ah erawh 47.99%-ah a tlahniam leh a ni. Fatality rate hi 2.80% a ni bawk. 

Indian Council of Medical Research (ICMR) chuan darkar 24 chhungin sample 1,39,485 an enfiah hman tih an sawi a, sample 4,242,718 an endik tawh tih an sawi a ni, Indian Council of Medical Research hian sample endik lamah hian nasa takin hma an la a, tunah hian ram pumah laboratory 710 Covid-19 sample endikna atan hian pawmpui a ni tawh a, heng zinga 498 chu sorkar laboratory niin 212 chu private a ni thung.

Health Ministry chuan Covid-19 enkawlna tur bik damdawi-in 952 a awm tih sawiin isolation bed 66,332 a awm mek a, ICU khum 21, 393 awmin oxygen pekna tur khum 72,762 a awm mek bawk.