Maharashtra-in Covid data a ennawn vangin thi zat an pung

India ramah Thawhlehni khan hri kai thar 42,015 an awm belh leh a, ram pumah hri kai hmuhchhuah vaibelchhe 3.12 an awm tawh. Hemi ni vek hian hri vanga thi zat chu nasa taka pungin, mi 3,998 an awm a ni. Hei hi June 12 hnu lama ni khatah hri vanga thi an tam ber ṭum a ni.

Thawhlehnia hri vanga thi zat nasa taka a punna chhan hi Maharashtra-in data a ennawn hnuah, a hmaa hri vanga thi zingah a telh lohte a telh thar leh vang a ni. Maharashtra bikah hian Thawhlehnia Covid-19 vanga thi chhinchhiah chu 3,509-an tling a, ram chhung hmun danga hripui vanga thi chu 489 an ni thung. Hripui len tirh aṭang khan mi nuai 4.18-in an thihpui tawh a ni.

Zirchianna thar berin a tarlan danin, official-a chhinchhiah aiin India rama hri vanga hi an tam zawk hle thei a, Covid-19 vanga thi hi maktaduai 4.9 vel an ni mai thei niin an sawi. He report hi Washington-a hmunpui nei, Centre for Global Development leh chief economic adviser hlui Arvind Subramanian siam niin, hri len tirh aṭanga kumin June thla thlenga chhan hrang hrang vanga thi te chu an huam tel tir a ni.

India-ah hri kai mek, active case chu nuai 4.07 ah tla thlain, nitinin an tlahniam zel. Hri kai hmuhchhuah tawh aṭangin hri kai mek hi 1.30% an ni. Thawhlehni khan dama chhuahtir 36,977 an awm a, dama chhuah tir zat chu vaibelchhe 3.04 an tling tawh. Dama chhuahtir zat, recovery rate hi 97.36% a ni. Nitina hri kai zat,daily positivity rate chu 2.27% an ni a, ni 30 chhung a zawnin 3% hnuailamah a awm tawh.

Thawhlehni khan vaccine dose nuai 34 semchhuah leh niin, ramchhungah vaccine dose vaibelchhe 41.54 semchhuah a ni tawh tih health ministry chuan a sawi.

Sorkar laipui chuan kum tawp hmain ramchhunga puitlingte chu vaccine pek hman vek a tum a ni. Tun thleng hian vaccine pali - Covishield, Covaxin, Russia's Sputnik V leh Moderna te chu India-ah hman phalna pek an ni tawh.

Vaccine palite chu mihringah enchhin mek zel a ni a, chutih laiin Genique Life Sciences siam chu advanced pre-clinical stage-ah a awm mek tih Union Science and Technology Minister Jitendra Singh chuan a sawi. Biological E Ltd's vaccine pawhin clinical trial phase 3 neih mek a ni bawk.

India ram mipui hmum thuma ṭhena hmun hnih emaw 67.6% te chuan coronavirus do theihna, antibodies an nei tawh niin serosurvey ṭum lina result chuan a tarlang tih sorkar chuan a sawi. Hetih lai hian hri vanga nunna chan hlauhawm thei vaibelchhe 40 chuang an la awm a, mipuite chu dan bawhchhe lo turin sorkar laipui chuan a ngen.