Oxygen indaih loh vanga thi an awm lo : Sorkar laipui Congress-in Health Minister lakah privilege motion put luh tum

Sorkar laipui chuan ram chhunga hri leng mekah, state hrang hrang data pek luhah hri kai thi zingah oxygen indaih loh vanga thih phah an awm thu tarlan a ni lo tih Rajya Sabha a hrilh. Hei hi eptu party-te chuan na takin an sawisel zui nghal.

Hri leng thawh hnihna hluar lai khan ram chhung hmun tam takah hospital an indaih a, dam lo enkawlna tur medical indaih lohna pawh a nasa hle. Hei vang hian ram tam takin oxygen leh damlo enkawlna tur mamawh dangte pawh an thawn a ni. Hetih laia sorkar laipuiin oxygen indaih loh vanga thi an awm lo nia a sawi chu eptu lam chuan a ngaithiam lo hle. Congress party chuan Rajya Sabha-a he thu sawitu, Union Minister of State (MoS) for Health Dr Bharati Pravin Pawar lakah privilege motion put luh a tum.

Congress hruaitu KC Venugopal chuan health minister Dr Pawar-i chuan Covid-19 vanga thihna thleng chungchangah House chu thu dik lo a hrilh a ni, a ti. "Sorkar chuan oxygen indaih loh vangin thi an awm lo tiin a sawi. Hetih lai hian state tinah hri kai, oxygen indaih loh vanga thi tam tak kan hmu a ni. Minister hian House hi thu dik lo a hrilh a ni," a ti. Oxygen indaih loh vanga thi an awm lo tia sorkar laipui thusawi chuan Covid hri dona kawnga sorkar hma lak dan chu a tichiang hle a ni, tiin Congress party chuan a sawi.