Thla 14 chhungin India naupang 1,19,000 in enkawltu an chan

Covid-19 hri a len hnuah thla 14 chhungin ram 21-a naupang maktaduai 1.5 chuang anmahni enkawltu (primary leh secondary caregiver) an chan a, heng zingah hian India naupang 1,19,000 an tel niin The Lanchet-a zirchianna tihchhuahah tarlang a ni.

National Institutes of Health (NIH) peng pakhat hnuaia zirchianna neihah hian, India rama naupang 25,000 te chuan Covid-19 vangin an nu(mother) an chan a, naupang 90,751 in an pa(father) an chan a, naupang 12 chuan an nu leh pate an chan ve ve a ni tih an tarlang.

Khawvel ram hrang hrangah Covid-19 vangin naupang 11,34,000-te chuan an nu/pa emaw an chenpui pi/pu emaw an chan. An zinga naupang 10,42,000 te chuan an nu/pa emaw an pahnihin emaw an chan a ni. Naupang 15,62,000 te chu an nu/pa emaw an mahni enkawltu emaw an pi/pute'n an thihsan tih NIH chuan a sawi.

Naupang, anmahni enkawltu (nu/pa emaw pi/pu) chan awm tam zualna te chu South Africa, Peru, United States, India, Brazil leh Mexico te an ni. Covid kaihhnawih vanga Primary caregivers thi rate sanna te chu Peru, South Africa, Mexico, Brazil, Colombia, Iran, United States, Argentina leh Russia te an ni.

"Naupangin an nu leh pa emaw anmahni enkawltu emaw an chan hnua an tawrhna te chu a rapthlak thei hle a, an tawrhnain nghawng ṭha lo a neih tur ven pui dan pawh zirchian a ni. Anmahni ngaihsak a, an duhzawng ti ve thei turin zalenna kan pe ve tur a ni," tiin NIDA Director Nora D Volkow chuan a sawi.