SC-in travel policy in ang hmang turin hriattir

Supreme Court chuan nimin khan Delhi, Uttar Pradesh leh Haryana sorkarte hnenah Delhi-National Capital Region (NCR) ah kar khat chhung ngeia common travel policy hmang turin a hriattir. 

Hripui leng vangin state hrang hrang sorkar chuan inkalpawh dan chung changah khuahkhirhna hran te an siam a ni. Delhi, UP leh Haryana pawhin khuahkhirhna hran an siam vang hian state inkalpawhna lamah mi tam takin harsatna an tawh phah a ni.

Supreme Court-ah hemi chungchangah hian PIL thehluh a ni a, nimin khan judge pathum Justice Ashok Bhushan, Sanjay Kishan Kaul leh MR Shah awmna bench chuan a ngaihtuah a ni. 

Sorkar laipui chuan state dang leh Delhi inkalpawhna kawnga khuahkhirhna siamte chu state sorkarte siam a ni tiin, sorkar laipui chuan hemi chungchangah chinfel dan tur rawtna a pe thei lo a ni, tiin SC hi a hrilh. Hei vang hian bench chuan state pathum aiawhte chu meeting nei a, common pass siam dan ngaihtuah thuai turin a ti. 

Thawhṭanni khan Delhi chief minister Arvind Kejriwal chuan khawpui chhunga Covid-19 kai an pun belh zel avangin delhi ramrite chu kar khat chhung khar turin a ti a ni. Hemi hma hian Uttar Pradesh leh Haryana sorkar chuan Delhi aṭanga Gurgaon, Noida, Ghaziabad leh a chhehvel bial danga luh an lo khap tawh bawk.