Srinagar hospital beihna kaihhnawihah mi panga man

Srinagar police-te chuan Thawhlehni-a Srinagar-a Shri Maharaja Hari Singh (SMHS) Hospital bula firfiakten police party an beih avanga Pakistan firfiak Naveed Jhatt a tlanchhuah chungchanga inhnamhnawiha rinhlelh mi panga an man.

Police-te chuan police-te kut aṭanga Naveed Jhatt a tlanchhuah theihna tura puitute zawnchhuah tumin Kashmir chhim lama Pulwama district chhunga hmun hrang hrang an dap nghal a, an mi rinhlelh mi panga-te chu an man ta a ni.

Thawhlehni khan police-te chuan medical check-up nei turin Jhatt leh mitang dang pali chu SMHS Hospital hi an panpui a, mahse hospital bulah firfiakten lo beiin police pahnih an kaphlum a, Jhatt hi police-te kut aṭanga tlanchhuakin firfiak dangte nen hian an tlanbo zui a ni.

Senior police officer chuan mi pali an mante chu Pulwama area-a cheng vek an nih thu a sawi a, hospital bula inbeihna a thlen lai pawhin an awm a, an zinga pahnih phei chuan silai pawh an lo hmetpuak niin a sawi. Heng mite hi CCTV camera footage aṭang leh, social media-a an inbiakna aṭangin pawikhawihnaa an inhnamhnawih dan hi hriat a nih thu official-te chuan an sawi. Heng mi pali-te bakah midang paruk chu thu zawhchian tura hren an ni bawk.

Pakistan firfiak pawl, Lashkar-e-Taiba chuan SMHS hospital bula police-te beitu chu an nih thu a sawi tawh a, hei hi an member Naveed Jhatt chhanchhuahna atana tih an nih thu a tarlang bawk.

Kum 20 mi, Jhatt hi LeT headquarters, Muridke-ah a training ṭhin a, kum 2012 khan kum naupang tein India ramah a rawn lut a n. Kum 2014-ah man niin Srinagar central jail-ah dah a ni.