Sonia Gandhi-in Rahul-a a ring tawk

Kum sawmhnih dawn Congress president dinhmun lo chelh tawh, Sonia Gandhi chuan party president thar, a fapa chu a ring tawk tih a sawi.

New Delhi-a Congress parliamentary party meeting-a thu a sawiah, Sonia Gandhi chuan Rahul Gandhi chu a boss a ni tawh tih sawiin, a ring tawk thu a sawi a, midangte pawhin theihtawpa an thlawp zel a beisei thu a sawi bawk. Party President leh hruaitu dangte chu theihtawpa thawhpui zel a tum thu a sawi.

Centre-a Narendra Modi-a kaihhruai sorkar laipui chu sawiselin, Sonia chuan tuna sorkar mek hnuaiah ram danpui thuneihna pawh a chak lo sawt hle tih a sawi. Parliament, judiciary, media leh civil society-te chu an hnuaichhiah a, investigative agency-te pawh politics lama an hmelmate beihna atan hmangin, Dalit-ten beih an tawk fo a, hna thar siam belh a ni bawk lo a ni, a ti. Modi-a kaihhruai sorkar chuan a hlawhtlinna hrang hrangte sawi fo ṭhin mah se, a takah chuan thil a dang daih a ni, a ti.

Tun hnaia Rajasthan by-election-a Congress-in hnehna a chan chungchang pawh sawichhuakin, Sonia chuan Gujarat-ah dinhmun harsa tak aṭanga an chet ṭhat dan leh Rajasthan by-election-a hnehna an chan chu thil puitham tak a nih thu a sawi. Hei hian boruak awmdan a inthlak chhoh mek thu a tilang hle niin a sawi a, Karnataka-ah pawh an party chu an chet ṭhat ngei a rin thu a sawi.

Sonia Gandhi chuan party mi leh sate chu nakkum Lok Sabha inthlanpui neih tur atana theihtawpa inbuatsaih turin a fuih. Inthlanpui neih tur hi ruahman lawk aiia a hma thut theih thu a sawi bawk.