Pakistan ISI tana enthlatu Air Force official man

Delhi Police Special Cell chua Pakistan Inter-Services Intelligence (ISI) tana enthlak hna thawka puh, Indian Air Force official chu Nilaini khan manin, Ningani khan court-ah hruai a ni.

Group Captain Arun Marwah chu Pakistan hnena information leh document pawimawh hrilhruah puhin thubuai siamak a ni a, thuruk a hrilh zingah hian Indian Air Force operation kimchang tarlanna pawh a tel nia sawi a ni.

Captain Marwah-a lakah hian Official Secrets Act hnuaiah thubuai siamsak a ni a, a thubuaiah hian thiam loh chantir a nih chuan kum sarih thleng lung-in tantir theih a ni ang.

Kum 51 mi, IAF officer hian WhatsApp hmangin Pakistan agent, hmeichhia anga insawi pahnihte hnenah thurukte hi a hrilh ṭhin nia sawi a ni. ISI agent-te hian model anga insawiin, thla eng emaw kalta khan Facebook-ah Marwah-a hi an friend a, hemi hnu hian WhatsApp hmangin an inbe chhunzawm a ni. Officer hian Pakistan agent-te hi cyber warfare leh special operation chungchanga thu pawimawhte a hrilh a ni. Marwaha hian a smartphone hmangin IAF headquarters-a document pawimawhte thla chu lain, WhatsApp in Pakistan agent-te hi a thawn ṭhin a ni.

Special Cell special commissioner MM Oberoi chuan Marwaha hi a chetdanah rinhlelhna an neih avangin January 31 khan IAF chuan a lo hreng tawh a, IAF hian Delhi Police-te chu a awmdante chhui chiang turin a ngen a ni, a ti. Special Cell lam hian uluk taka an chhui chian hnuah Official Secrets Act hnuaiah thubuai ziaklutin an man zui tan niin Oberoi chuan a sawi. South Delhi-a Lodhi Colony area-a Special Cell headquarters-ah thu zawhfiah mek a ni a, thurualpui a neih leh neih loh pawh chhui mek a ni bawk.