Parliament budget session thawh khatna zo

Parliament budget session thawh khatna chu nimin khan a zo a, March 5-ah inkhawm hi chhunzawm lehin April 6 thleng neih a ni ang.

Nimina Lok Sabha rorel inkhawmah Andhra Pradesh member-te chuan an state puihna tam zawk pe turin sorkar laipui an phut leh a, Zero Hour-ah Telugu Desam Party (TDP) leh Yuvajana Shramika Rythu (YSR) Congress member-te chu an au bengchheng leh a ni. Member-te hi House laiah an chhuak khawm a, an au bengchhen avang hian inkhawm pawh rei vak lo tihtawp lailawk a ngaih phah a ni.

House Speaker Sumitra Mahajan-i chuan nimin atana ngaihtuah tur paper-te a pharh hnuah, rorel inkhawm hi a titawp a ni.

Rajya Sabha-ah pawh Andhra Pradesh member-te chaun PM Narendra Modi-an kum 2014-a a lo tiam tawh, Special Category Status, Andhra Pradesh Reorganisation Act chu a taka kalpui tura sorkar an phut thu an sawi. TDP member-te hi chhuak khawmin an state tana rorelna dik an duh thu an aupui a, chairman Venkaiah Naidu chuan member-te chu khap tum mah se a thu an zawm loh avangin inkhawm pawh a tihtawp lailawk phah a ni.

Parliament budget session hi January 29 khan ṭan niin, session ṭan ni hian joint sitting hmaah President Ram Nath Kovind chuan thu a sawi a ni.