Rijiju lakah privilege motion pulut

Congress MP Renuka Chowdhury chuan Union Minister Kiren Rijiju-an Facebook-a amah nuih sawhna lam hawi video clip a post avangin minister lakah privilege motion a putlut.

Rijiju hian Nilaini zan khan a Facebook-ah kum 1980 chhoa chhuak ṭhin, 'Ramayana' series video clip, lal Ravana farnu sual, Surpanakha ring taka a nui lai a post a ni. Video tawp lamah hian Rajya Sabha-a Prime Minister Narendra Modi-an a thusawi laia ring taka Renuka Chowdhury a nuih avanga a nuihsawhna thu a sawi lai a tilang tel a ni.

Chowdhury-i chuan Prime Minister-in a nuihsawh dan leh Rijiju-a thil post chuan a rilru a ti na hle tih a sawi.

Rajya Sabha-a President thusawi chungchang leh sorkar scheme chungchang debate an neih laiin Chowdhury-i nui ri hi hriat a ni. Rajya Sabha chairman, Vice President Venkaiah Naidu chuan a khap a, mahse hei hi PM Modi chuan lo chhangin, Renuka-i chu nui chhunzawm phalsak tur leh, Ramayana serial tih lohah chuan chutiang nui ri chu hriat tur a awm lo niin a sawi.

PM hian a hminghmerhin sawilang lo mah se, social media lamah Chowdhury-i hi Ramayana series-a misual nu, Surpanakha nen a tehkhin niin an sawi darh nasa hle. Chowdhury-in a sawisel hnuah Rijiju hian a Facebook page aṭangin video clip hi a paih a, mahse Twitter-ah Ramayana clip tel lo hian a post leh a ni.

Congress party chuan PM Modi chu a office zahawmna tihniamah a puh a, Chowdhury chungchang a sawi danah thupha chawi turin an phut.