Loneitute'n Delhi-ah nawrh huaihawt

Sorkar laipuiin farm law thar pathum a siam duh loa Delhi border-a hun rei tak lungawi lohna lantir tawh, loneitute chuan nimin khan Delhi-a Jantar Mantar-ah nawrh an huaihawt.

Loneitute hian Parliament mon­soon session neih chhungin Parliament building bulah farm law duh lohna hi lantira nawrh huaihawt an tum thu an lo sawi tawh a ni.

Nimin khan Singhu border aṭangin loneitu 200 vel chuan bus-in Jantar Mantar an pan a, chawhma dawr 11 aṭanga tlai dar 5 thleng sit-in protest an nei a ni.

Bharatiya Kisan Union (BKU) hruaitu Rakesh Tikait chuan boruak ṭha tak hnuaiah nawrh hi an kalpui dawn tih sawiin, an kalkawng tura thuneitute phalna a pek chin bakah kal an tum lo tih a sawi.

Nawrh huaihawt vang hian boruak ṭha lo a thlen palh venthawn thilah police tam tham tak duty tir an ni. January 26-a loneituten Delhi khawpuia tractor rally a neihah khan buaina nasa tak a chhuak a, hei vang hian buaina a chhuak leh hlauthawnna a lian a, phalna pawh pek an ni mai lo a ni. Thawhlehni khan Delhi sorkar leh police-te chuan Covid protocol zawm chunga nawrh huaihawt phalna hi an pe chauh a ni. Phalna pekah hian sit-in protest neihna hmuna hian ṭum khatah mi 206 chin chauh an awm phalsak an ni a, a tel turte pawhin ID card an ken tel zel a ngai a ni.

Jantar Mantar-a nawrh huai­hawtnaah hian loneitute chuan Parliament kalphung pawh zawm ve vek an tum tih sawiin, speaker leh deputy speaker-te inruatin, thingpui in chawlhte pawh an nei dawn tih an sawi.

Union agriculture minister Naren­dra Singh Tomar chuan loneitute nena inbiakna nei turin sorkar chu a inpeih reng tih a sawi a, prime minister Narendra Modi kaihhruai sorkar chu loneitute hmakhua ngaitu a ni tiin, farm law an siam tharte pawh loneitute tana ṭha zawk tur a ni, a ti. Sorkar laipui leh loneitu pawl aiawhte hi ṭum 11 an inbe tawh a, mahse inremna an la siam thei lo a ni. Loneitu lam hian farm law pathum, Farmers' Produce Trade and Commerce (Promotion and Facili­tation) Act, 2020, Farmers' (Empowerment and Protection) Agreement on Price Assurance and Farm Services Act, 2020 leh Essential Commodities (Amendment) Act, 2020 te chu ṭhiah leh vek an phut a, mahse sorkar lam chuan ṭhiah loin a ṭul anga siamṭhat a inhuam thu a sawi thung.