Covid-19 vanga fahrahte pualin PM-Cares scheme hnuaia inziahluhna tur portal duang
Sorkar laipui chuan Covid-19 hripui len hnua hri vanga nu leh pa chan, nu/pa emaw zawk zawk chan, dan anga anmahni enkawltu chanten PM-Cares for Children Scheme hnuaiah chhawmdawlna an dawn theihna tura inziahluhna tur portal a duang.
He portal-ah hian online registration tih theih a nih dawn bakah, a him zawkna turin fimkhur thuhlaah, application tracker pawh an dah dawn a ni.
"PM Cares For Children" scheme hmang hian naupangte chu zirna ṭha an dawn theihna atan te, kum 18 an tlin thleng thlatin stipend leh kum 23 an tlin hunah Rs nuai 10 an dawn theihna turin ruahmanna siamsak an ni.
He scheme hi May 29 khan prime minister Narendra Modi chuan a tlangzarh a ni. State leh district-a scheme hmanna tura enkawltu tur, nodal ministry atan ministry of women and child development chu thlan an ni. Hemi atana portal an duan hi National Informatics Centre siam chhuah niin, WCD ministry hian an enkawl tel nghal bawk ang. Portal kaltlang hian inziaklut te chu hriat tur pawimawh leh thu tharte hrilhhriat ṭhin an ni ang.
Child welfare committee leh district magistrate te chu portal-ah hian thuneihna sang pek an ni dawn a ni. Naupang chanchin leh nihna chiang zawka hriat theihna turte ruahman niin, state tinte hman theih turin official-a tlangzarh thuai an beisei tih an sawi.
Scheme hnuaiah hian naupang hmingin Rs nuai 10 chu fixed deposit-in dahsak an ni dawn a, kum 18 an tlin thleng thla tin stipend kum nga chhung pek an ni ṭhin dawn a ni. He stipend kaltlang hian higher education an kal chhunga an mamawh leina tur pek an ni ṭhin ang. Kum 23 an tlin hunah an puala sumfai dah chu ṭum khatah an la chhuak vek thei dawn a ni.
National Commission for Protection of Child Rights chuan Supreme Court thuchhuak angin hripui len chhunga naupang nu/pa emaw an pahnih emawa chante data thawn turin state tin hnenah hriattirna an thawnchhuak tawh.
Supreme court-a affidavit thehluh hnuhnung berah chuan hripuiin a nghawng naupang 30,071 zinga 3,621 te chu fahrah an ni a, naupang 26,176 chuan an nu emaw pa emaw an chan a, chung zinga naupang 274 te chu enkawltu nei loa hnutchhiah, abandoned an ni.