India-ah Covid-19 kai thar 35,342 awm belh : Nilaini aiin 14.5% in hri kai an tlem zawk
India chuan mellung thar phunin, ramchhung mipui hnenah coronavirus vaccine dose vaibelchhe 42 chuang a semchhuak tawh.
Ram pumah hri kai thar zat pawh tlahniam zelin, Nilaini khan hri kai thar 35,342 an awm belh a, hri vanga thi 483 an awm. India ramah Ningani thleng khan hri kaihhnawih vanga thi nuai 4.19 an awm tawh a ni.
Kerala-ah hri kai thar 12,818 hmuhchhuah thar awmin, hmuhchhuah tam berna state a ni. Kerala-ah hian thosi aṭanga inkaichhawn theih Zika virus kai 44 hmuhchhuah an awm thar bawk.
Ramchhungah Mucormycosis, "Black fungus" tia sawi kai mi 45,374 hriatchhuah an ni tawh a, he hri vang hian mi 4,332 an thi tawh tih sorkar chuan a puang.
India-a test positivity rate a tlahniam zel a, ni 32 chhung chu 5% hnuailamah awm tawhin, Ningani khan 2.14% a ni. Hri kai enkawl dam, recovery rate pawhin hma sawn zelin 97.36%-ah a kai tawh.
Hri kai mek, active case chu 3,881 in a thlahniam a, hri kai mek nuai 4.05 an awm a ni. Hri kai tawh aṭanga chhutin hri kai mek zat hi 2.14% an ni.
Ram chhungah vaccine dose vaibelchhe 42 chuang semchhuah tawh a ni. Ningani bikah zan dar 7 thleng khan vaccine dose nuai 48.86 semchhuah a ni tih health ministry chuan a sawi.