Pegasus chhui chiang tura Rahul Gandhi ngenna sorkarin a hnawl

Congress party hruaitu, Rahul Gandhi-a'n Israel software, Pegasus hmanga politician leh journalist ṭhenkhatte phone enthlak nia sawi chungchang, court-in chhui chiang tura a phutna chu sorkar laipui chuan a hnawl. Pegasus hmanga enthlak zingah hian Rahul Gandhi phone number pawh hi a tel nia sawi a ni.

Union minister of state for home affairs, Ajay Kumar chuan spyware case chungchang hi an sawifiah vek tawh nia sawiin, chhui kher a ngai lo, a ti. He thil buaipuitute chu politics lama hlawhchham, thil dang buaipui tur dang nei lo an ni, a ti.

Hetih lai hian Israel company NSO spyware Pegasus data leak-a target hrang hrang an tarlanah India ram ami 300 phone number a lang a, an zingah hian Rahul Gandhi hi a tel. Gandhi bakah eptu hruaitu pahnih, union minister pahnih, sumdawng lian Anil Ambani, CBI hotu hlui, leh journalist 40-te number pawh an tel. Company hian he software hi sorkar hnenah chauh a hralh a, sorkar chauhin an khawih theih avangin eptu party-te hian he thilah hian sorkar laipui chu inhnamhnawihah an puh a ni. Mahse sorkar chuan an puhna hi a pha thung.

Rahul Gandhi chuan ,"Israel ngei pawhin Pegasus chu ralthuam, firfiakte enthlakna tur tiin a sawifiah tawh a ni. Prime Minister leh Home Minister chuan he ralthuam hi India state leh institution-te enthlakna ralthuam atan an hmang a ni," tiin Supreme Court chhui chiantir a phut. Home Minister pawh bang turin a phut bawk.