AIIMS Delhi in kum 2-6 inkar tan Covaxin dose hnihna trial nei dawn

All India Institute of Medical Sciences (AIIMS) New Delhi chuan naupang kum 2-6 inkar tan Bharat Biotech Covid-19 vaccine,Covaxin dose hnihna trial an nei dawn tih a puang.

AIIMS Delhi hi kum 18 hnuailam tana vaccine enchhinna hmunpui ber pakhat a ni. Clinical trial result te hi kum bithliah hrang hrang te an enchhin zawh tawh hunah remkhawm lehin thla khat hnuah an tichhuak dawn a ni. He trial-ah hian naupang kum a zirin chhawng thumah ṭhen hran leh an ni.

Trial vawi khatna hi kum 12-18 inkar tan neih hmasak a ni tawh a, kum 6-12 inkarin dawtin, kum 2-6 ten trial hi an nei leh mek a ni.

Sorkar laipui chuan Delhi High Court chu naupang kum 18 hnuailam tan Covid-19 vaccine clinical trial neih chu zawhfel a nih hnai tawh thu pawh alo hrilh tawh a ni. Supreme Court hnenah pawh Zydus Cadila DNA vaccine kum 12-18 inkar tana neih chu zawh a nih thu pawh an hrilh tawh bawk.

"DNA vaccine siam­chhuaktu Zydus Cadila chuan kum 12 aṭanga 18 inkar tan clinical trial an zawhfel thu kan dawng a, phalnate hmuh a nih hunah heng kumte tan hian vaccine hi pek theih thuai beisei a ni," tiin sorkar laipui chuan a sawi a, a theih anga ranga vaccine 100% pek chhuah chu sorkar ngaih pawimawh ber niin, hemi tihlawhtling tur hian theihtawp an chhuak mek thu a sawi.