MP sorkar fiah turin hriattir
Madhya Pradesh governor Lalji Tandon chuan chief minister Kamal Nath kaihhruai sorkar chuan thlawptu a ngah tawk em tih vawiina fiah turin Assembly Speaker Narmada Prasad Prajapati a hriattir.
Inrinni zan kha Governor chuan CM pawh hi lehkha pein, vawiina assembly-a thu a sawi zawhah, sorkar fiah turin a hrilh a ni. Governor chuan, "MLA 22 in Assembly speaker hnenah banna lehkha an thehlut tih ka hria a, electronic leh print media lamah pawh anmahni ngeiin an puangzar bawk. Hemi hnu hian heng MLA-te hian a hrana lehkha min rawn pe lehin, banna lehkha thehluh an duh avanga venhimna pawh pe turin min rawn ngen a ni," tiin a lehkhaah hian a tarlang. Hei vang hian vawiin aṭanga MP Assembly session ṭan turah, House-a thu a sawi zawhah sorkar fiahna hi nei turin Speaker Prajapati a ngen zui a ni.
Madhya Pradesh-a rorellai, Congress hruaitu, Jyotiraditya Scindia chuan Congress chhuahsanin BJP a zawm a, Scindia thlawptu Congress MLA-te chuan Speaker hnenah banna an thehlut zui ve leh bawk. Speaker chuan MLA paruk te banna thehluh chu a pawmsak tawh. Sorkar fiah a nih dawn tak avangin politics buaina avanga Congress party-in an MLA-te Jaipur resort-a a dah khawmte chu nimin khan an state lamah hruai kir an ni. Member 230 awmna, Madhya Pradesh assembly-ah hian Congress chuan MLA 108 neiin, an thawhpui MLA dang pasarihte thlawpna nen sorkar a siam mek a ni. MLA 22-te banna hi pawmsak vek an nih chuan Assembly member tam zawng hi tla hniamin, majority nei turin member 104 thlawpna neih a ngai ang. BJP hian MLA 107 a neih avangin awlsam takin sorkar a siam thei dawn a ni.