Sorkar laipuiin Covid-19 national disaster-ah a puang
Sorkar laipui chuan kar kal ta Inrinni khan Covid-19 chu national disaster-ah a puang. Ramchhunga he hri leng laka invenna kawnga hma la turin State executive committee din a ni.
National disaster-a sorkar laipuiin a puan tak avangin, State Disaster Response Fund (SDRF)-a sum leh pai pawh he hri donna atana hman theih a ni. Rinhlelh thila an dahhrante chaw ei tur, thuamhnaw, damdawi leh thil ṭul dang atan SDRF hi hman tura tih a ni. SDRR-a pawisa hi 25% aia tam lo hmang turin MHA chuan State executive committee a chah bawk.
State executive committee chuan mahni awmna state-ah rinhlelh thila dahhranna camp siam zat tur an ruahman dawn a, dahhranna camp-a inrelbawlna, mi awm zat leh thil ṭul dang dang chu an kutah a awm nghal bawk ang.
Sorkar laipui hian Covid-19 hri kai damdawi-ina enkawlte chu an awmna pawisa chawi tur zat bituk turin state sorkar thuneihna a pe bawk. Ministry of Home Affairs (MHA) chuan ramchhunga state tinte leh union territory zawng zawngte chuan Covid 19 chungchang hi ngaihthah loa, bengkhawn reng turin a hriattir bawk a ni.
Ramchhunga Covid-19 kai te hnenah sorkar laipui chuan an mahni ṭanpui nan Rs. nuai 4 a pe dawn. Hriat theih chinah India ramah mi 107-in he hri hi an kai tawh a, mi pahnih an thi tawh bawk.
Thite bawihsawm dan tur Health Ministry-in ruahman
Ramchhungah Covid-19 vanga thi mi pahnih an awm tih hriat a nih hnuah, union health ministry chuan he hri vanga thite bawisawm dan tura inhriattirna thuchhuah a siam.
He hri kaite khawih kher lo hian he hri hi a kai theih tho a, he hri vanga thi damdawi-ina mortuary-a dah aṭangte pawhin he hri hi a inkai chhawn theih a ni. Mitthi ruang hi mortuary-a lak chhuah dawna an thisen a put chhuah lohna turin fimkur taka an ruang phur chhuak ṭhin turin Health Ministry chuan a tarlang.
Vanduaina avanga he hri kai thite ruang phum dawn chuan a chhuat hi cement a siam tur a ni tih a ni bawk a, natna awm dan zirna room autopsy room-a awm tur chin pawh bithliah fel a ni bawk. March 10 khan Karnataka-ah kum 76 mi Mohammed Hussain Siddiq chu Covid-19 vang hian a thi a, March 13 khan Delhi-a RML Hospital-ah hmeichhia kum 68 mi a thi leh bawk a ni.