AIIMS hotuin booster dose a ṭul dawn tih a sawi

All India Institute Of Medical Science (AIIMS) hotu, Dr Randeep Guleria chuan Covid-19 hri chi hrang awm belh leh hri inthlak danglam zel do hneh turin, Covid vaccine dose hnih bakah booster dose lak tel a ṭul tih a sawi.

ANI-in a kawmnaah, Dr Guleria chuan coronavirus variant thar awm zel avangin booster dose lak belh hi a ṭul dawn tih a sawi. Booster dose hi second-generation vaccine a nih tur thu a sawi nghal bawk.

Dr Guleria chuan booster vaccine hi enchhin mek a ni tih pawh a sawi a, kumin chhung chuan booster hi kan la mamawh dawn a ni, a ti. Hemi rual hian vaccine la thei chinte pek kim a nih hunah chauh booster dose hi pek chhuah a ni ang tih a sawi .

Ram pumah kum 18 leh a chunglamte vaccine pek runpui kalpui chhunzawm zel a ni a, hetihlai hian kum 18 hnuai lamte hnena vaccine pek tur, Bharat Biotech siam Covaxin chu enchhin mek niin September thlaah result tihchhuah hman beisei a ni. Naupangte tana vaccine pek tur enchhinna, trial hi thawh thuma neih niin, a thawh khatna chu kum 12-18 inkarah neih a ni a, a dawtah kum 6-12 inkarah neih ni lehin, tunah hian kum 2-6 inkarah neih leh mek a ni.

Zydus Cadila chuan a vaccine siam, ZyCoV-D chu kum 12-18 inkarah enchhinna a lo nei zo tawh bawk a, July 1 khan emergency a hman phalna a dil tawh a ni. An vaccine hi khawvela Plasmid DNA vaccine hmasa ber a ni. An dilna hi drug regulator, Drugs Controller General of India (DCGI) chuan a ngaihtuah ang.

AIIMS hotu chuan September thla chuan naupangte hnenah vaccine hi pek theih a ni tawh dawn niin a sawi.