Smartphone hmangtu naupang 59.2% in message thawn nan hmang ; Online Learning atana hmang 10.1% chiah an awm : NCPCR

National Commission for Protection of Child Rights (NCPCR) zirchianna neihah, smartphone hmang ṭhin naupang zinga 59.2% chuan instant messaging application khawih nan an hmang a, online learning leh zirna kaihhnawih atana hmang chu 10.1% chiah an awm.

"Naupang 59.2% te chuan an smartphones/internet devices-te chu inbiakpawh nan (WhatsApp/Facebook/Instagram/Snapchat) an hmang. Naupang zinga 10.1% te chuan online hmanga lehkha zirna atan an hmang thung a ni," tiin zirchianna hian a tarlang.

'Effects (Physical, Beha-vioural and Psycho-social) of using Mobile Phones and other devices with Internet Accessibility by Children' tih hminga zirchianna neihah hian naupang (kum 8-18 inkar) 30.2% te chuan anmahni pualin smartphone an nei tih tarlan a ni bawk.

Report chuan, naupang kum 10 zinga 37.8% chuan Facebook account an nei tawh a, 24.3% chuan Instagram account an nei tih a sawi.

Zirchianna hi mi 5,811-ah neiin, an zinga 3,491 te chu naupang school kallai an ni a, nu/pa 1,534 leh ramchhunga state paruk-a school 60 aṭangin zirtirtu 786 an tel a ni. Ramchhunga bial hrang hrang, East, West, North, South, and North-East region huamin neih a ni a, naupang thlante hi kum zat in ang lo tak tak niin, an kum zat chawhrual hi kum 14.05 a ni.

Zirchianna chuan naupang kum zat leh an social media account neihin nghawng a neih dante sawiin, "Naupangin mut hmaa mobile an hman hian sleep disorder, mut theih lohna, anxiety, taksa chauhna te a thlen thei, " niin an sawi.

Zirtirtu zinga 72.07% chuan smartphone an hmanin harsatna an tawh loh thu an sawi a, 54.1% te chuan classroom-a smartphone hman hian rilru a la peng tih an sawi thung.

AIIMS Behavioural Addiction clinic-a mithiamte chuan internet addiction laka inveng tur chuan nu leh pate'n an fate uluk taka an thlithlai a ṭul thu a sawi."Nu/pa te hian naupangte chu phone an khawih nasa lutuk tur veng a, screen time tihtlem sak turin mihring nun hona atana pawimawh (life skills) lam an kawhhmuh a ngai a ni," an ti.