Ram pumah vaccine dose vbc 43 chuang pe chhuak tawh

India ram pumah Inrinni zan thleng khan vaccine dose 43,26,05,567 pek chhuak a ni tawh tih union health ministry chuan a sawi. Inrinni bik khan dose nuai 46 pek chhuah a ni.

Health ministry-in thuchhuah a siamah, January 16 aṭanga ram pumah vaccine pek chhuah runpui neih a nih aṭangin vaccine dose vbc 43 chuang pek ni tawh in, vaccine drive thawh thumna kalpui a nih aṭang khan state/UT 37-ah kum 18-44 inkar mi 13,77,91,932-ten dose khatna a la tawh bawk a ni, a ti.

Madhya Pradesh, Maharashtra leh Uttar Pradesh-ah chuan kum 18-44 inkar mi vaibelchhe khat chuangten vaccine hi an la tawh. Andhra Pradesh, Assam, Chhattisgarh, Delhi, Haryana, Jharkhand, Kerala, Telangana, Himachal Pradesh, Odisha, Punjab, Uttarakhand leh West Bengal-ah chuan hemi kum inkar mi nuai 10 chuangten vaccine hi an la tawh bawk a ni.

Vaccine pek runpui kalpui mek hi zawhfel a nih hun tur sorkarin hun a tiam thei lo a, mahse kumin December thlaah chuan kum 18 chunglamte chu pek kim hman an tum tih a sawi.