Firfiakten J&K-a army camp an bei : Sipai panga leh civil mi pakhat thi

Jammu and Kashmir-a Sunjuwan area-a Army Camp chu kar kalta Inrinni zing khan firfiakten an bei a, sipai panga leh civil mi pakhat an thi. Sipaite hian camp beitu firfiak pali an kaphlum bawk. Mi 11 in hliam an tuar bawk a ni.

Firfiakte hi residential quarters bulah awmin sipaite chuan an bei let a ni. Sipaite hian zan lamah an inkap chhunzawm lo tih sawiin, family quarters-a chengte hruaichhuah tuma hma an lak thu an sawi. Indian Army chief General Bipin Rawat pawhin nimin zing khan Jammu a thleng a, commander-te a kawm nghal a ni.

Pakistan firfiak pawl, Jaish-e-Mohammed mi leh sa nia hriatte chu Inrinni zing dar 4.45 vel khan army camp vengtu te nena an inkah hnuah camp chhungah hian an lut a ni. Family complex lamah lutin, hei hi sipaite chuan hualin an inkap zui nghal a ni.

Army camp beih a nih avang hian Inrinni vek khan Chief Minister Mehbooba Mufti-i chuan top official-te chu emergency meeting a neihpui nghal. Deputy Chief Miniter Nirmal Singh chuan pawikhawihna thleng chu a dem thu sawiin, Pakistan chuan direct taka India hmachhawn ngam loin, civil mite beih nan ruahmanna tenawm tak a hmang a ni, a ti. Congress president Rahul Gandhi pawhin army camp beih a ni chu a dem thu sawiin, firfiakte beihletna kawngah ram pumin security force-te chu a thlawp ni, tiin a sawi. Firfiakte pawikhawihna avanga thi chhungte leh hliamte a tawrhpui thu a sawi bawk.

Kum 14 kalta khan Sunjuwan camp hi firfiakten an lo bei tawh bawk. Firfiak pahnih chuan military camp hungna thirlen te chu chep chhian kum 2003, June 28 khan an luhkhung a, sipai 12 an kaphlum a ni.