Karnataka CM BS Yediyurappa a bang

Karnataka chief minister leh BJP hruaitu, BS Yediyurappa chuan nimin khan Chief Minister a nihna aṭanga a ban thu a puang. Amah thlaktu tur ruat a nih hma chuan caretaker CM angin a la awm zui ang.

Kum 79 mi, Yediyurappa hian CM term lina hi kum hnih chhung a chelh hman a, mahse tun hnaiah state BJP chhungah Chief Minister thlak tura phutna a awm a, hemi hnu hian amah zawk hian banna hi a thehlut ta a ni.

Yediyurappa chuan a banna lehkha chu Governor hnenah a thehlut tih sawiin, bang tur hian tumahin an nawr lo tih a sawi bawk. "Prime minister Narendra Modi, Amit Shah leh JP Nadda-te chungah lawmthu ka sawi. Kum 75 ka pelh hnuah pawh Chief Minister ni turin hun ṭha min la pe a ni. Ban chungchang hi a hma pawhin ka lo ngaihtuah tawh a ni, tunah kan sorkarin kum hnih a hman tlin leh tak avangin ban hun ṭha ber niah ka ngai a ni," a ti. BJP hian CM dinhmun chelh tura kum bithliah hi kum 75 chinah a lo siam tawh a ni.

Chief Minister thar tur hi party hotute chuan ni hnih thum hnuah an tihfel hman beisei a ni bawk.