Rahul Gandhi-a'n farm law duh lohna a lantir

Congress party hruaitu Rahul Gandhi chuan nimin khan farm law thar pathum duh lohna lantirin Parliament building thleng tractor-in a kal.

"Parliament-ah loneitu aiawhin thu thlen tur ka nei. Sorkar laipui hian loneitute ka a hup beh sak a, Parliament-ah pawh hemi chungchang sawihona hun a siam duh lo bawk. A dan siam thar ṭha lo takte hi an hnukkir leh ngei tur a ni. Rampuma mipuite hian he dan hi sumdawng lian 2-3 tana hamṭhat dawnna tur chauh a ni tih an hre vek," tiin Rahul chuan a sawi.

"Sorkar ngaihdan chuan loneitu hi an hlim em em a, pawna ṭhua lungawi lohna lantirtu chu firfiak hmuhin an hmu a ni. A tak ramah erawh loneitute dikna hi chhuhsak a ni," a ti.

Loneitute tam tham tak chuan nikum November thla aṭang khan Delhi-a ram ri pathumah farm law hlih phutin lungawi lohna an lantir tawh a ni. Farm law pathumte hi ṭhiat leh vek tura an phut bakah, minimum support price (MSP) siamna tur dan thar siam an hmuh bawk.

Kar hmasa aṭanga Parliament monsoon session neihah eptu member-ten farm law chungchang sawi a, an inhnial buai avangin rorel inkhawm pawh ṭum eng emaw zat tihtawp lailawk a ni tawh. Congress MP ṭhenkhat chuan buaina chinfel anih hma loh chu House-ah rorelna kalpui an duh lo tih an sawi. Parliament kawtah lungawi lohna an lantir bawk a ni.

Union agriculture Minister Narendra Singh Tomar chuan farm law hi thil hlawk thlak tak a ni a, loneitute nen an sawiho leh theih tur thu a puang. Mahse a hmain loneitute leh sorkar laipui aiawhte hi ṭum eng emaw zat an lo inbe tawh a, inremna an la siam thei lo a ni.