India-ah Covid-19 kai thar 39,361 awm belh

India-ah Pathianni khan Covid-19 kai thar 39,361 an awm belh leh a, hri kaihhnawih vanga thi 416 an awm bawk. India ramah hri kai hmuhchhuah 3,14,11,262 zinga mi 4,20,967 chu hri kaih hnawih vangin an thi tawh a ni. Hri kai mek, active case 4,20,967 an awm.

Hri kai hmuhchhuah thar hi 3.14% niin, ni 34 chhung chu a zawnin 3% hnuai lamah a awm tawh a ni. Sorkar laipui chuan state leh UT-te tan Covid-19 vaccine dose vaibelchhe 45.37 a pechhuak tawh tih Union Health Ministry chuan a sawi.

Kerala-ah hri kai 17,466 an awm leh a, ramchhunga hri kai hmuhchhuah tam berna state a ni leh. Covid-19 vanga thi mi 66 an awm bawk.

Maharashtra chu ram chhunga hripui leng tuar na ber an la ni. Pathianni khan hri kai thar 6,843 leh hri vanga thi 123 an awm leh a ni.

Delhi-ah nimin aṭang khan cinema hall, theatre leh multiplex-te chu mipui leng zat aṭanga 50% punkhawm phal a ni. Delhi Metro te chu bithliah zat awm loin service phal an ni tawh a, DMRC chuan coach khat zelah mi 50 aia tam chuan an phal lo thung a, passenger te chu din an phal lo bawk a ni. Inneihna leh mitthi vuinaah mi 50-100 inkar kal phal a ni bawk.

India rama mihring tamna ber state Uttar Pradesh-ah chuan hri kai thar pathum leh coronavirus vanga thi pakhat chiah an awm.

Mizoram chu hmarchhak state zingah hri kai hmuhchhuah thar tamna ber a ni a, Manipur(1,207) leh Assam (1,054) ten an dawt.

Punjab sorkar chuan Thawhṭanni aṭang khan pawl 10, 11 leh 12 tan school hawn phalna a pe. Goa sorkar chuan August 2 thleng curfew a puang thung.