Ni 132 hnuah hri kai hmuhchhuah 30,000 aiin an tlem ta

India ramah Thawhṭanni khan Covid-19 kai thar 29,689 an awm leh a, ni 132 hnuah hri kai thar 30,000 aia tlem hmuhchhuah leh ṭum khatna a nih bakah Pathianni ai khan 9,672 in an tlem zawk bawk. Covid-19 vanga thi 415 awm lehin, Thawhṭanni khan sample nuai 17.2 endik a ni.

Hri kai mek, active case chu ni 124 hnuah nuai li hnuailamah a tlathla. Hri kai mek nuai 3.98 awmin, March 25-a nuai 3.95 an awm hnua an tlem leh ber ṭum a ni.

Kartina hri kai zat, weekly positivity rate chu 2.33% niin, nitina hri kai zat, daily positivity rate chu 1.73% a ni. 5% hnuailamah kan awm mek laiin, kumin April 23 aṭang khan kar khat chhunga hri kai zat chawhrual hi 6.9% a la ni pha thung.

Hri kai pakhatin midang a kaichhawn leh zat 'R' value hi data thar berah chuan hlauhawm chin, danger mark 1.0 a thleng ṭep. Kar li liamtaa 0.85 aṭang khan kar hmasaah 0.95 a kai chho tawh a ni. 1.0 'R' value hian mi pakhatin midang pakhat hri a kaichhawn zel ang tihna a ni a, hripui leng mek khauhkhirh tur chuan 1.0 hnuailamah a awm a ngai.

Kerala-ah hri kai thar 11,586 leh hri kaihhnawih vanga thi 135 an awm belh leh.

State sorkarin ni thum chhung Eid lawm phalna a pek avangin hri kai nasa takin an punbelh phah a ni. He thuthlukna hi Supreme Court chuan sawisel mah se, thutlukna pass a nih hnua ni hnih a liam tawh avangin SC thupek hi state chuan a zawm duh lo a ni.

Hri leng tuar natna ber, Maha-rashtra-ah chuan hri kai thar 5,000 aia tlem an awm tawh a, mi 53 an thi a ni. State chhungah hian hri kai mek 92,088 awmin, March hnua an tlem ber ṭum an thleng.

Hmarchhak state-ah delta variant vangin hri kai thar an pung zel. Assam chuan hri kai thar 1,528 an nei leh a, Manipur-ah 989, Meghalaya 569, Arunachal Pradesh 490 leh Tripura-ah 458. State ṭhenkhat chuan hri leng khuahkhirh tumin lockdown an puang leh a ni.

Vaccine dose vaibelchhe 44.19 semchhuah a ni tawh a, Thawhṭanni khan dose nuai 66 semchhuah a ni. Heng zinga mi nuai 19.78 chuan dose hnihna an dawng tawh a ni. Kumtawp hmaa puitling hnenah vaccine pek hman vek tum erawh an la hlat rih hle thung.

Delta variant hi coronavirus version zinga thawk na leh chak ber nia sawi a ni a, Delta variant hi vaccine la lo zingah inkaichhawn a awlsam mai bakah damdawi-ina dah ngai khawpin an hriselna dinhmun a tlahniam thei a ni. Zirchianna chuan vaccine dose la kim tawh pawhin Delta variant hi an kaiin an taksaah hna a thawk thei tih mithiamte chuan an sawi.