CAA rules siam nan thla 6 dang hun mamawh belh : MHA

Ministry of home affairs (MHA) chuan Citizenship Amendment Act (CAA) rules siamna turin thla ruk dang hun a mamawh belh tih nimin khan Parliament a hrilh.

Congress MP Gaurav Gogoi zawhna chhangin, minister of state for home affairs Nityanand Rai chuan kum 2019, December 12 khan CAA chungchanga hriattirna hi tihchhuah niin kum 2020, January 10 aṭangin hman ṭan a ni, a ti. Rai chuan Lok Sabha leh Rajya Sabha-a Committees on Subordinate Legislation hnenah hun pek belh tura ngenna hi thlen a ni tawh tih a sawi nghal bawk.

CAA hnuaiah hian Pakistan, Bangladesh leh Afghanistan aṭanga Hindu, Sikh, Jain, Buddhist, Parsi leh Kristian sakhaw zuitu, an rama sakhaw thila beih tawk avanga India rama rawn tlanlutte chu India khua leh tui nihna pek theih an ni ang.Hetih lai hian Muslim sakhaw zuitute telh an nih ve loh avangin sawiselna leh, sakhaw inthliarna tia sorkar puhna pawh a lianin, hmun tam takah dodalna pawh nasa taka lantir a lo ni tawh a ni.

Eptu party leh pawl hrang hrangten an dodal chungin Parliament-ah Citizenship Amendment Bill chu pass a ni a, president Ram Nath Kovind chuan dana chan tir turin kum 2019, December khan a pawmpui tawh bawk a ni.