PM-in Parliament-a Congress party chet dan Mipui hmuha pho lang turin BJP MP-te a hrilh

Prime minister Narendra Modi chuan nimin khan BJP parliamentary meeting-ah Congress party chuan Parlia-ment monsoon session neih mekah rorel thei loa buaina siamah puhin, Congress party thiltih dan chu mipuite hriat pho lang turin BJP MP-te a hrilh.

PM chuan kar hmasaa Covid-19 leng mek dinhmun thlira all-party meeting buatsaih Congress-in an boycott chungchang pawh sawiin, midangte pawh tel turin an dang a ni, a ti. July 19-a minister tharte hmelhriattirna hun a hman pawh eptu party member-te au buai avanga tihtawi a ngaih phah thu sawiin, "Congress leh eptu party dangte thiltih dan hi media leh mipuite hriatah pho lang rawh u," tiin a chah a ni.

Eptu MP-te au buai avangin Parliament in hnih chu rorel mumal thei loin, ṭum eng emaw zat inkhawm tihtawp lailawk ngaiin an lo awm tawh a ni. Nimina Lok Sabha inkhawmah Congress MP Gaurav Gogoi chuan Assam-Mizoram border buaina thleng chungchang sawiho a phut a, MP Manicka Tagore pawhin prime minister emaw, union home minister emaw awm lai ngeia Pegasus buaina sawiho a phut bawk. Member-te an au buai leh avangin chawhnu lam thleng inkhawm hi tihtawp a ni a, Thawhṭanni khan ṭum thum tihtawp a lo ni tawh bawk. Rajya Sabha inkhawm pawh Pegasus leh farm law chungchanga eptu member-ten lungawi lohna an aupui avangin tihtawp a ni bawk a, Thawhṭanni khan ṭum nga tihtawp a ni bawk a ni.