CM zingah 11-in thubuai an nei Chief Minister zingah Chandrababu Naidu a hausa ber, Manik Sarkar a rethei ber

Association for Democratic Reforms (ADR) leh National Election Watch (NEW) state assembly leh union territories hrang hranga chief minister ṭanglai-te affidavit thehluh an zirchianna aṭangin Thawhṭanni khan report an tichhuak a, CM 31 zinga 11-te chuan pawikhawihna thubuai, criminal case nei lai an ni.

ADR leh NEW hian CM-ten inthlan an hmachhawn hnuhnung bera an affidavit thehlut an zirchianna aṭangin report hi an siam a, ṭhenkhat chu an thubuai dinhmun hi a danglam tawh nia sawi a ni.

ADR chuan chief minister 31 zinga 11 (35%) hian an affidavit-ah criminal case nei lai an nih thu an tarlang niin a sawi. Heng zinga 26% chu thubuai rip tak–tualthat, tualthah tum, inbum, pawikhawihna thlen tuma puhna thubuaite an nei.

CM 31 zingah 25, 81% chu mi hausa tawntaw, croreparti an ni a, CM-te hausakna hi chawhrualin mi pakhatin cheng vaibelchhe 16.18 nei ang an ni. CM zingah hian cheng vaibelchhe 100 chuang nei pahnih awmin, Andhra Pradesh Chief Minister Chandrababu Naidu chu a hausa ber a, a thil neih hlut zawng hi cheng vaibelchhe 177 hu a ni. Arunachal Pradesh Chief Minister Pema Khandu chuan cheng vaibelchhe 129 hu a nei bawk. Punjab Chief Minister Amarinder Singh chuan cheng vaibelchhe 48 a nei bawk a ni.

State hotu zingah hian cheng vaibelchhe 10-50 nei mi paruk an awm a, Rs vbch 1–10 nei mi 17 awmin, cheng vaibelchhe nei pha lo paruk an awm.

CM zingah Tripura Chief Minister Manik Sarkar chu a rethei ber a, a thil neih hlut zawng chu cheng nuai 27 a ni. Cheng nuai 30 hu neitu, West Benjal Chief Minister Mamata Banerjee-in dawtin, Jammu and Kashmir Chief Minister Mehbooba Mufti-i chuan cheng nuai 56 hu a nei bawk.

Chief Minister 31 zingah doctorate degree nei 3%, post graduate 16%, graduate professional 32%, graduate 39%, class 12th pass 10% an awm. CM 31 zingah hian hmeichhia pathum chauh an awm a ni.

Arunachal Pradesh Chief Minister Pema Khandu chu CM zingah naupang ber niin kum 35 a ni a, Maharshtra CM Devendra Fadnavis chu kum 44 niin, Uttar Pradesh CM Yogi Adityanath chu kum 45 mi a ni. CM zinga upa ber chu Punjab CM Amarinder Singh a ni a, kum 74-a upa a ni. CM zinga kum 70 chunglam dang awmte chu Kerala CM Pinarayi Vijayan (72) leh Mizoram CM Lal Thanhawla (71)-te an ni.

CM zingah hian kum 40 hnuai lam pakhat, 41-50 inkar pali, 51-60 inkar 10, 61-70 inkar 13 leh kum 70 chunglam pathum an awm.