Srinagar-ah LeT firfiak pahnih kaphlum

Jammu and Kashmir-a Sringar khawpuia Karan Nagar area-ah nimin khan security force-ten LeT firfiak pahnih an kaphlum.

Kashmir IGP SP Pani chuan Pakistan firfiakten kar kalta Inrinni zana Jammu-a Sunjuwan area-a army camp an beih hnuah security force-te hian firfiak leh an thurualpuite dapin beihpui an la thlak chhunzawm zel tih a sawi. Army camp beitu firfiak pathumte chu sipaite hian an lo kaphlum tawh bawk a ni.

SP Pani chuan Karan Nagar area-a inbeihnaah firfiak pahnih chu kahhlum ni lehin, an kut aṭang hian silai leh silai mute pawh man a nih thu a sawi. He inbeihnaah hia CRPF sipai pakhatin hliam an tuar a, mahse a ngaihtuahawm lo niin a sawi.

Pakistan firfiakten an beih, Sunjuwana army camp hi enfiah a nih hnuin Thawhṭanni zan khan sipai pakhat ruang hmuh belh leh a ni a, he camp beihnaa sipai thi hi paruk leh civil mi pakhat an tling tawh a ni.

Firfiakten army camp an beih vang hian thil awmdan ngaihven turin Thawhṭanni khan Defence Minister Nirmala Sitharaman-i chuan Jammu a tlawh. Minister chuan pawikhawihna thleng chungchangah Pakistan chu a dem thu sawiin, an pawikhawih man hi an pek ngei ala ngai dawn tih a sawi. Camp beih a nih chungchanga finfiahna hrang hrang lakkhawmte chu Pakistan hnenah pek a ni leh dawn tih a sawi a, hemi rual hian a hma pawhin Pakistan hnenah firfiakte finfiahna lehkha pek a nih pawhin an chungah action a la ngai chuang lo niin a sawi bawk.