AP special status pek phutin YSR Congress MP-ten ban tum

Andhra Pradesh-a eptu pawl lian ber, YSR Congress chuan BJP kaihhruai National Democratic Alliance (NDA) sorkarin a hmaa an lo tiam tawh anga Andrha Pradesh chu special category status a pek loh chuan April 6-ah an party MP-te chu an bang vek dawn niin a sawi.

YSR Congress president YS Jaganmohan Reddy chuan Thawhlehni khan an thil phut a hlawhtlin loh chuan an party MP-te an ban tur thu hi a sawi a ni.

Nellore district-a Kalikiri-a rally neihnaa thu a sawiah Jagan hian hemi chungchang hi a sawichhuak a ni. "Parliament budget session hi March 5 aṭang hian neih chhunzawm lehin, April 6 thleng neih a ni dawn a ni. Kan party MP-te chuan session chhung hian sorkar laipui chu special category status min pe turin an nawr chhunzawm leh ang. Mahse theihtawp kan chhuah chung pawha sorkar laipuiin kan thil phut a ngai pawimawh lo a nih chuan, YSRC MP-te hian April 6 hian banna an thehlut dawn a ni", a ti.

YSRC president hian Thawhṭan zan khan an party MP leh MLA-te chu emergency meeting a neihpui a, Union Budget pharh takah Andhra Pradesh ngaihthah a nih chungchanga an lungawi lohna kalpui zel dan turte an sawiho a ni.

Kum 2014 Lok Sabha inthlanpuiah khan YSRC khian seat riat a la a, mahse an MP pahihte chuan TDP an zawm a, pakhat chu neutral-in a awm zui bawk. Rajya Sabha-ah MP pakhat an nei bawk a ni.

Kum 2014, February 20-a Parliament-a Andhra Pradesh ṭhendarhna tur, AP Reorganisation Act pass a nih khan sorkar hmasa, UPA sorkar chuan Andhra Pradesh hi special category status pek a tiam a ni. Kumin February 1-a NDA sorkarin Union Budget 2018 a pharhah khan special status pek tur chungchang hi engmah sawilan a ni lo a, hei vang hian Andhra Pradesh-a sorkar lai party, TDP leh eptu party-te pawh an lungawi lo hle.