Uma Bharti-in kum thum chhung inthlan chuh tum lo

Union minister Uma Bharti-i chuan a hriselna ṭhat tawk loh vangin kum thum chhung chu inthlanah chuh a tum dawn lo tih a sawi. Hemi rual hian politics erawh a chawlhsan dawn lo tih a sawi.

Thawhlehni-a Bhopal-a chanchin thar lakhawmtute a kawmnaah, "Hnung leh khup na ka nei a, hei vang hian ka chawlh rih deuh a ngai a ni. Kum thum chhung chu inthlanah ka chuh lo ang", a ti.

Union Minister for Drinking Water and Sanitation chuan Rajya Sabha inthlanah pawh chuh a tum rih lo tih a sawi a, mahse a ṭul a nih chuan an party tan a campaign tur thu a sawi. Jhansi BJP MP chuan zing dar 9 aṭanga tlai dar 5 thleng hna thawh a duh tih sawiin, nunphung pangngai tak, doctor thurawn pek anga khawsak theih a duh thu a sawi bawk.

Bharti chuan BJP president Amit Shah chuan kum 2019 thleng union minister hna chu chelh chhunzawm tura a ngen thu a sawi. Hun eng emaw chen han chawlh lailawk chu thil danglam tak pawh a nih loh thu sawiin, Bharti chuan prime minister hlui Atal Bihari Vajpayee pawh kha politics a khelh vanglai khan a hriselna dinhmun ṭhat loh vangin hun eng emaw chen a chawl niin a sawi.