RSS hotu lakah thubuai thehlut

Rashtriya Swayamsevak Sangh (RSS) hotu Mohan Bhagwat-an Indian Army-ten thla ruk chhunga sipai an chherchhuah theih laiin RSS-in ni thum chhung lekin a ti thei ang tia a sawi chungchangah a lakah thubuai thehluh a ni.

Bihar-a Muzaffarpur khuaa cheng, Raju Nayiar chuan Thawhlehni khan Chief Judicial Magistrate court-ah RSS hotu hian Indian Army-te hmutsitna lantira puhin thubuai a thehlut a ni. Court chuan vawiinah a thubuai thehluh hi a ngaihtuah ang.

Nayiar chuan complaint a thehluhah hian RSS hotu hian ram mipuite rilru a ti na chauh ni loin, Indian Army-te hmusitna a lantir a ni, a ti. RSS hotu Bhagwat hian Pathianni kaltaa thu a sawinaah, Indian Army-in ram venhim hna thawk tura sipaite inpeih tur thla ruk hun a duh laiin, RSS chuan ni thum chhung lekin ramri-a hmelmate bei turin sipaite a siam thei ang tiin a sawi a ni.

Muzaffarpur-a RSS function-a thu a sawiah, Bhagwat chuan RSS chu sipai pawl ni lo mah se sipai anga inthunna nei ṭha an nih thu a sawi. Ramin a mamawh a, ram danpuiin a phalsak a nih chuan RSS-te chu ramriah hmelma do tura an inpeih reng thu a sawi bawk.