Karnataka CM thar atan Basavaraj Bommai lalut

Karnataka Chief Minister thar atan nimin khan Basavaraj Bommai chu rinawmna thu tiamtira lakluh a ni.

Kum 61 mi, Veerashaiva-Lingayat hnam Bommai hi chief minister hlui, Janata Dal party member SR Bommai-a fapa a ni. Veerashaiva-Lingayat hnam hi Karnataka state mipui maktaduai 68 zinga 16% an tling pha a ni.

Govenror Thaawarchand Gehlot chuan Bengaluru-a Raj Bhavan-ah Bommai hi rinawmna thu tiam tirin a lalut a, CM thar lakluh inkhawmah hian a thlak tak, CM hlui Yediyurappa pawh a tel. Bommai hi Yediyurappa a CM lai pawha a thachhang dawltu pawimawh tak a ni ṭhin.

Mechanical engineer niin Pune-a Tata Motors-ah kum thum thawkin, a hnuah industrial entrepeneur a ni. Politics a luhchilh hnuah Janata Dal (United) a zawm a, kum 1997 khan a a ṭum khatna atan Karnataka Legislative Council member-ah thlan a ni a, kum 2003-ah thlan nawn leh a ni. Chief minister hlui JH Palte-a political secretary a ni ṭhin a, council-ah opposition deputy leader a ni tawh bawk.

Kum 2008-ah Janata Dal chhuahsanin BJP a zawm a, hemi kuma assembly inthlanah BJP candidate niin Shiggaon bialah MLA atan thlan tlin a ni. Kum 2013 leh 2018 khan thlan tlin nawn leh a ni. BJP sorkar hmasaah khan water resources and cooperation minister a ni. CM hlui Yediyurappa kaihhruai sorkarah home minister niin, law leh parliamentary affairs bakah legislature-te a chang tel bawk a ni.

Chief Minister atana lakluh a nih hnua thu a sawi­ah, Bommai chuan BS Yediyu­rappa kaihhruai sorkar hna­thawhte chu a chhunzawm zel tur thu a sawi.