Sorkar laipuiin private sector-te vaccine quota tihhniam tum

Sorkar laipui chuan private hospital-te tana vaccine quota 25% a siam chu tihniam a tum.

Senior official chuan chief minister hrang hrangte chaun sorkar laipui hnenah vaccine pek tur an la tam tham avangin sorkar quota 75% chu tisang a, state-te hnenah vaccine tam zawk pe turin an ngen a ni, a ti. Private hospital-te tana bithliah, 25% dah sak chu an la zo pha lo a, hetih lai hian state-te hnena vaccine pek chhuah chu a tlem phah avangin a semchhuah kawngah pawh beisei ang a phak lo a ni.

State sorkar tinte'n sorkar laipui aṭanga an dawn, vaccine hi a thlawna an semchhuah laiin private hospital-ah chuan Covishied dose khat Rs 780 leh Covaxin Rs 1,410-a lak a ngai thung.

Official chuan private hospital quota 25% tihhniam sak tumna hi vaccine siamchhuaktute nena sawiho ngai thil a nih thu a sawi nghal bawk. Vaccine siamtute hian sorkar laipuiin a leisak, 75% hi man tlawm zawka an leitir avangin private hospital hnena an hralh hian sum an hmu ṭha zawk a ni.

India rama vaccine siamchhuaktu pahnihte chuan sorkara vaccine an supply-na man chungchang hi ngaihtuah ṭha turin an lo ngen tawh a, hei vang hian sorkar pawhin order a siam hnuhnung ber, July 16-a a siamah a man hi a tihsan sak a ni. Covishield dose khat Rs 205 leh Covaxin Rs 215-in a tihsan sak a, a hma chuan heng vaccine pakhat hi dose khat Rs 150 ve vein a leisak ṭhin.