Hri kai thar an pung leh

29th July, 2021

India ramah Thawhlehni khan coronvirus hri kai thar 43,654 an awm belh leh.

Thawhṭanni khan thla li dawn hnuah a ṭum khatna atan hri kai thar hi 30,000 hnuailamah a tla thla hman a, mahse Thawhlehni khan pung lehin a hma ni aia hri kai punna hi 47% a tling pha a ni. Positivity rate hi 2.51% a ni mek a, hri vanga thi 640 awm lehin, ramchhunga thi tawh zat chu nuai 4.22 an ni.

Hri leng mekah mipuite inthlahdul mai lo tura chahin, "Khawvel huapin hrileng hi a la tawp mai dawn lo. Kan fimkhur a ngai, kan chau tawh a ni maithei, mahse he hri erawh a la chau ve lo a, hei vang hian inring renga kan awm a ngai", tiin National Expert Committee on Vaccine Administration chairman, Dr VK Paul chuan a sawi.

Dr Paul chuan vaccine chak zawka sem pawimawhzia sawiin, "Vaccine-te hian 100% in min veng thei lo mah se, vaccine zawng zawng, keimahni siamchhuah tiamin, hri vanga enkawl ngaihtuahawm khawpa natna a thlen theihna chu kan dang thei tep tawh a, hri vanga thihna kan nuai bo thei ṭep tawh a ni," a ti.

Thawhlehni khan Kerala-ah hri kai thar 22,129 an awm leh a, state ṭhenkhata hri kai an tlakhniam zel laiin Kerala-ah hri kai an la pung zel thung. "Hri kai thar zinga 50% te hi Kerala leh Maharashtra aṭanga hmuhchhuah an ni. Damlo enkawlna an neih ṭhat avangin mitthi erawh an tlem phah a ni." tiin Health Ministry chuan a tarlang.

Sorkar laipuiin Parliament-ah state hrang hrangah hri kai zingah oxygen indaih lohna vanga thi report a awm lo tia a lo sawi tawh chu sawiselna a nasa hle a, hei vang hian sorkar chuan state leh UT-te hnenah data a dil thar leh a ni. He data hi Parliament session neih chhung ngei hian tarlan hman a tum.

Naupangte tana vaccine pek tur pawmpuina pek a ni dawn tih Thawhlehni khan BJP MP meeting-ah prime minister Narendra Modi chuan a sawi.

Health Ministry tarlan danin, Thawhlehni khan ramchhungah hri kai mek,active case 3,99,436 awmin, hri len tirh aṭanga hri kai tawh zat aṭangin 1.27% a ni. Khawvel pumah Covid-19 kai hmuh chhuah vaibelchhe 19.53 an awm tawh a, hri vangin nuai 41 chuang an thi tawh bawk.