Kerala-ah complete weekend lockdown puang

Kerala-ah Covid-19 kai thar 22,000 chuang hmuhchhuah a nih hnuah state sorkar chuan July 31-August 1 chhung complete weekend lockdown a puang. Sorkar laipui chuan Kerala-ah hian National Centre for Disease Control team a tir dawn.

"Sorkar chuan National Centre for Disease Control-a Director hoin member paruk awmna team chu Kerala-ah hian a tir dawn a, team-te hian Covid hri leng thununna kawnga state sorkar hmalakna hrang hrangte enpuiin an theih angin an pui dawn a ni,"tiin union health minister Mansukh Mandaviya chuan a sawi.

Kerala-a hri leng tuar na zual district-te chu Malappuram, Thrissur, Kozhikode, Ernakulam, Palakkad, Kollam, Alappuzha, Kannur, Thiruvananthapuram leh Kottayam-te an ni.

Indian Council of Medical Research (ICMR) serosurvey tarlan danin, district 11-a zirchianna aṭangin, mipui hmun thuma ṭhena hmun hnihte chuan coronavirus do theihna,antibodies an nei tih an sawi. Serosurvey hi June 14 leh July 6 chhung khan neih a ni.

Kerala hian Nilaini khan Covid-19 kai thar 22,056 an awm belh leh a, hri kai 33,27,301 hmuhchhuah awm tawhin, hri kaihhnawih vanga thi 131 awm belh lehte nen state chhunga thi zat hi 16,457 an tling tawh a ni. Hri kai mek,active case 1,49,534 an awm bawk.

West Bengal-in Aug 15 thleng khuahkhirhna pawtsei
West Bengal sorkar pawhin hri leng vanga khuahkhirhna a siam chu August 15 thleng a pawtsei. Hemi rual hian a hmaa khuahkhirhna siam ṭhenkhat chu thlahdul a ni thung.

Sorkar programme, indoor facility-a neihah 50% seat capacity tel phal a ni a; bus, taxi leh autorickshaw-te pawh 50% capacity an lak phalsak a ni bawk. Sorkar leh private office-ah thawktu chanve chin kal phal a ni. Zirna inte chu khar chhunzawm a la ni ang.

May 16 khan sorkar chuan khuahkhirhna hi siamin, July 30 thleng atan a pawtsei tawh a, mahse hri kai thar an la awm belh zel avangin August 15 thleng atan a pawtsei leh ta a ni.

Hri kai 43,509 awm belh leh
India ramah Nilaini khan Covid-19 hri kai thar mi 43,509 an awm belh leh a, hripui thihpui mi 640 an awm. Hemi ni vek hian hri kai enkawl dam mi 38,465 an awm bawk.

Kerala chu hri kai thar tamna ber state a ni chhunzawm zel a, Maharashtra-in a dawt a ni.

India test positivity rate chu 5% hnuai lamah awm zelin, 2.38% a ni mek. Hri kai mek, active case pawh tlahniam zelin, hri kai hmuhchhuah tawh aṭangin 1.28% an ni. Hri kai enkawl dam, recovery rate chu 98.38% a ni.

AIIMS hotu Dr Randeep Guleria chuan India rama hri leng thawh thumna thleng tur chu Covid kaihhruaina dante zawm ṭhat a, vaccine pek chhuah ṭhat chuan a tihkhawtlaiin a thawh khatna leh thawh hnihna aiin a nep zawk thei dawn a ni, a ti.